Shefa FA hemi VFF nasonal jampionsip lik jampion

VFF nasonal jampionsip lik wina, Shefa FA. Shefa tim kapten, Jason Timatua i stab risivim kash praez long VFF Presiden, Lambert Maltok. (Charles Hakwa)

Shefa Futbol Asosiesen (SFA) hemi jampion blo fes eva Vanuatu Futbol Federesen (VFF) Nasonal Jampionsip Lik wei grand finol blong hem emi tekem ples long las Satedei daon long Korman Stadium.

Shefa hemi kam blong winim VFF nasonal jampionsip kap ia wetem wan kash praez blong VT1milion mo Sanma hemi stab olsem rana ap, i karem wan kash praez blong VT500,000.

Fulap futbol fans oli bin fulumap gud stadium blo witnisim grand finol maj ia.

Insaed long 5 minit blong fes haf, Sanma straeka, Aderick Olomele hemi kam blong putum Sanma lo lid taem wei hemi mekem wan naes run i ko insaed long penalty box blong Shefa mo i lukim Shefa golkipa, Daniel Alick hemi mestem blong holem bol mo i ko stret long leg blong Olomele blong tajem bol iko insaed long net.

Sanma FA tu hemi soemaot fulap gud kaonta atak blong savei kasem wan mo poen bakeken beh olgeta difens blong Shefa oli mentenem wol blong olgeta blong distebem evri janis wei Sanma i gat. Sanma hemi feil blong holem taet lid blong hem taem i lukim long 26 minit blong fes haf, Kalfer Kaltak hemi kasem wan gudfala kros long raet wing blong Shefa mo hemi tajem bol iko insaed long net blong Sanma blong equalizem sko long 1-1.

Tugeta tims oli kontinu blong putum presa beh nomo nao, nogat wan i savei putum wan mo poen blong tekem lid insaed long fes haf. Sanma FA tu hemi kam blong soemaot gud futbol skils long foret blong ol kraod tru long sam long ol pleias olsem, Olomele, Anthony Belly mo Wesley Popoi wei oli bin displei gud futbol tu long taem ia blong spidim kaonta atak blong tim.

Sekon haf i lukim Sanma hemi kam blong putum presa bigwan long Shefa taem i lukim ol ataks blong ol Sanma straeka oli kontinu blong finem wan mo poen. Shefa tru long kapten Jason Timatua, Japhet Toukone mo Kalfer Kaltak oli bin mekem fulap janis blong tim beh oli no savei finem wan gudfala finis. Shefa straeka, Tony Kalotang emi kasem fulap janis tu beh hemi no savei kasem wan gudfala finis.

Stret long 59 minit blong sekon haf, Kalfer Kaltak hemi tekem wan kona kik wei i lukim bol hemi flae stret kolo hed blong Shefa straeka, Tony Kalotang mo i hedem bol iko insaed long net blong Sanma. Long 75 minit, Shefa straeka, Kalotang, hemi mekem wan longfala low sut insaed long penalty box blong Sanma, mo i lukim Sanma kipa hemi feil blo kasem bol mo iko stret long net blong putum sko long 3-1.

Sanma hemi kontinu blong putum mo presa taem wei i lukim Olomele, hemi mestem wan poen stret long foret blong kipa blong Shefa afta long wan naes kros ova wei Maxim Kere hemi mekem. Stret long 90 minit extra taem, Sanma straeka, Anthony Belly hemi mekem wan naes run agensem Shefa difenda, Junior Felix, mo kam blong mekem wan pawaful sut wei i lukim bol hemi pasem Shefa kipa, Alick, mo i sko stret long net blong putum sko long 3-2.

Sanma hemi kontinu blong putum presa long ol las minit blong gem bei Shefa hemi kam blong plei wan difensiv gem mo holem taet sko i stab long 3-2 kasem finol wisel blong gem.

Koj blong Shefa, Benjamin Noel hemi talem sei hemi hapi bigwan long pefomens blong ol boy blong hem. Hemi sei, no mata tim hemi kasem fiu jalenj stat long dei 1 i kam, olgeta boes oli kontinu blong savei mentenem tim blong savei kam olsem fes jampion blong VFF nasonal lik ia.

Sanm koj, Samuel Kivi, hemi sei no mata hemi fes taem blong ol boes blong oli savei tekpat long wan tunamen olsem, hemi aprisietem bigwan long maj wei ol boes oli bin displei long hem.

Hemi talem tankiu tu long big man blong savei kivim janis ia tub long ol boe oli savei kam blong kompit long capitol, Port Vila.

Tugeta koj oli wantem extendem bigfala tankiu i kolo ol sapotas, famili mo frens wei oli savei kam blong sapot bigwan blong mekem finol ia i tenaot gud bigwan mo leftemap spirit blong futbol insaed long kantri.

VFF nasonal lik rep, Bong Shem hemi talemaot sei long nekis yia, bambae fomat blong tunamen bambae hemi jenis inkludum olgeta prizes tu. Mr Shem hemi talem sei bambae long nekis yia, bambae ol winas blong tugeta pul bambae oli plei wetem ol rana ap blong each pul blong finemaot tufala finol tims.

Hemi explenem tu sei unda long niu fomat ia, bambae i gat kash praez blong evri representatif blong tunamen ia.

Shefa Kapten, Jason Timatua hemi kam olsem bes pleia insaed long VFF nasonal lik jampionsip ia.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.