Port Vila Futbol Asosiesen (PVFA) 2020-2021 Premia Jampionsip hemi kik off yestedei aftanun daon long Port Vila Stadium.

Fes maj blong yestedei hemi stap bitwin Tafea FC mo premia niu kama, Seveners FC mo i lukim Tafea FC hemi kam blong winim maj ia long 3-2.

Long fes haf, Tafea FC raet midfilda, Micah Tommy hemi kam blong openem sko insaed long 10 minit blong gem.

Seveners FC we hemi jes kambak insaed long premia divisen oli bin plei wan slo gem blong faenem olgeta kaonta atak strateji blong hem be i lukim ol boes long grin mo blu oli no save faenem wan gudfala finis nomo insaed long teritori blong Tafea FC.

Tafea FC hemi kontinu blong putum presa bigwan long Seveners FC i lukim stret long 19 minit, Don Mansale, we hemi transfe aot long Tupuji Imere FC, hemi kam blong mekem wan naes pawaful sut we i lukim Seveners FC kipa hemi feil blong blokem bol long stret taem mo bol hemi ko insaed long net blong putum sko long 2-0.

Long 25 minit stret, Micah Tommy hemi kam blong putum sko long 3-0 afta long wan gudfala run we hemi mekem stret insaed long penalti eria blong Seveners FC.

Seveners FC hemi no lukluk daon mo hemi kam blong krietem tu fulap janis tru long kaonta atak blong ol, Spencer Noal mo John Wesly.

Stret long 27 minit, Seveners FC kaonta atak, Spencer Noal hemi kam blong mekem wan naes strong sut we i lukim bol hemi flae stret i ko insaed long net mo putum sko long 3-1.

Seveners FC ehmi kambak blong putum presa bigwan long Tafea FC mo i lukim olgeta boes long grin oli karem bak tim spirit blong gem mo kontinu blong soemaot kompitisen insaed long maj.

Long 33 minit blong gem, Seveners FC kaonta atak, Wesly hemi mekem wan run in insaed long penalti eria blong Tafea FC mo i lukim Tafea FC difenda, Junior Felix hemi mekem wan jalenj mo i lukim refri emi awodem wan penalti sut aot.

Seveners FC difenda, Sidan Wako nao hemi kam blong putum sekon poen blong tim mo putum sko i stap long 3-2.

Insaed long sekon haf, gem hemi kam moa strong taem i lukim tugeta saed oli kam blong spidim ap gem blong save kasem wan moa poen. Seveners FC hemi kam blong kasem tu fulap janis blong em blong ekwelaes be oli feil blong putum bol iko insaed long net blong Tafea FC.

Tafea FC hemi kam blong krietem tu fulap kaonta atak strateji blong hem, be ol boes long grin oli no letem eni bol blong ko insaed long net blong ol. Tru aot long 45 minit blong sekon haf, nogat wan tim emi kam blong kasem wan moa poen mo i lukim maj hemi stap long 3-2 kasem 90 minit blong gem.

Long olketa nara apdeit insaed long PVFA premia divisen, bambae i lukim long tis kaming Satedei, long 1pm, Galaxy FC emi plei Mauwia FC daon long Port Vila Stadium. Nekis maj hemi stap bitwin Erakor Golden Star FC mo Tupuji Imere FC long 3pm.

PVFA hemi konfem se pa long tis Satedei tu bambae i kat sam long ol premia gems pa oli tek ples tu daon long Korman Stadium. Fes maj long 1pm bambae Siaraga FC hemi plei North Efate FC. Las maj long 3pm bambae emi stab bitwin Ifira Black Bird FC mo Yatel FC.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.