PVFA 2019-2020 jampionsip hemi kam moa taf lo namba tri raon

Galaxy FC hemi kam blo dro wetem Erakor Golden Star FC lo 2-2.(FB)

Olgeta namba tri raon blo Port Vila Futbol Asosiesen (PVFA) 2019-2020 Premia lik jampionsip oli bin ko gud las Satedei lo Port Vila Stadium.

Lo fes maj blo dei, i lukim Yatel FC hemi kam blo plei agensem Tupuji FC. Afta wei tugeta tim oli no bin manej blo winim ol fes tu maj blo ol, oli bin traem bes bigwan blo savei kasem wan win insaed lo 2019-2020 jampionsip ya. Ful 90 minit blo gem, tugeta tim oli bin kat fulap janis bei nogat wan hemi savei kam blo tekem wan lid mo ajivim wan fes win tu. Gem i lukim tugeta tim hemi kam blo dro lo 0-0.

Sekon maj blo dei, Ifira Black Bird FC, hemi kam blo plei agensem Siaraga FC. Lo fes haf blo gem, Ifira FC hemi kam blo skorem wan poen tru lo Alphonse Lency. Siaraga hemi bin kat fulap jannis tu blo equalize bei olgeta difens wol blo Ifira oli no bin mekem wan isi gem blo ol straeka blo Siaraga FC oli savei kasemwan poen bihaen lo net bo ol. Gem hemi ko hed mo tufala tim oli bin kat fulap opotuniti bei oli no savei kasem ol gudfala finis wei oli wantem. Bifo fes haf hemi finis, Ifira midfielda, Jean Pierre, hemi kam blo silim lid blo Ifira FC blo savei skorem wan mo poen mo i lukim Ifira FC hemi tekem lid lo fes haf lo 2-0. Sekon haf hemi kik off, i lukim bol posesen hemi stap lo feva blo Siaraga FC, mo olgeta boe oli bin displei sam gudfala janis, bei golkipa blo Ifira hemi bin mekem sam gudfala blok blo disteb ol poen blo Siaraga FC. Ifira FC, wei i lukim wan lo ol top straeka insaed lo premia lik, Somari, hemi feil blo sko moa poen tru lo ol naes setap wei ol midfielda blo ol oli sta mekem. Presa hemi bigwan lo tugeta saed mo nogat wan hemi savei kam blo sko insaed lo las 45 minit blo sekon haf. Gem hemi finis mo Ifira FC hemi kam blo win lo 2-0.

Las maj blo dei i lukim Galaxy FC, wei hemi stap topem tebol naia, hemi kam blo plei agensem Erakor Golden Star FC. Lo ol fes 20 minit blo gem, Galaxy FC hemi kontrolem gem bigwan tru lo sistem wei Koj Moise Poida hemi kivim. No mata wei Galaxy FC hemi dominetem gem bigwan, tru lo Kensy Tangis, Bong Kalo mo Henry Manasseh, ol boe oli no savei kasem wan lid. Erakor FC hemi bin plei wan difensif taktik blo savei holem taet Port Vila jampion ia blo savei kasem wan lod o fes haf. Insaed lo 30 minit blo fes haf, midfielda blo Galaxy FC, Barry Mansale hemi feil blo holem taet bol lo leg blo hem, fiu mita klosap lo penalti box, mo i lukim Eraor FC kapten, Jackson Tasso hemi mekem wan nice daon bol sut mo i lukim bol hemi ko insaed lo net blo Galaxy FC mo putum Erakor FC lo lid wetem 1-0. Presa hemi kam bigwan moa lo tugeta saed mo Galaxy FC hemi mekem fulap opotuniti blo savei kasem wan equalize. Lo 35 minit insaed lo gem, olgeta difenda blo Erakor FC oli feil blo savei kliarem wan bol wei hemi kam lo midfielda blo Galaxy FC mo i lukim Kensy Tangis hemi kam blo hedem wan hae bol ova lo golkipa blo Erakor FC wei hemi kam blo distebem bol, mo i lukim bol hemi ko stret insaed lo golmaot blo Erakor FC, mo putum tugeta tim lo 1-1. Bifo fes haf blo gem finis, Bong Kalo hemi kam blo kivim Galaxy FC wan moa poen tru lo wan naes kona kik wei i lukim nogat wan lo ol difens blo Erakor FC hemi kam blo pusum aot bol mo i ko stret insaed lo gol maot. Fes haf hemi finis mo Galaxy FC hemi lid lo 2-1.

Sekon haf hemi stat, mo gem hemi kam mo strong bitwin tugeta saed. Galaxy FC hemi kam blo mekem fulap gol opotuniti bei ino savei kasem finis wei hemi wantem afta wei golkipa blo Erakor FC,wei hemi semtaem U-23 nasonal golkipa, hemi mekem fulap gud sef blo savei distebem ol janis blo Galaxy FC. Erakor FC tu i bin kat fulap janis blo equalize tru lo Kalfer Kaltack, bei golkipa blo Galaxy FC, hemi bin soemaot sam lo ol gudfala gol skils blo savei holem taet ol janis wei Erakor FC hemi bin kat. Henry Mansseh, Kensy Tangis mo Bong Kalo oli bin putum fulap presa lo ol difens wol blo Erakor FC blo kasem wan moa poen bei bol ino savei ko bihaen lo golmaot blo Erakor FC. Gem hemi bin ko moa taf mo i luim tugeta tim i displei wan gud futbol lo foret blo ol sapota wei oli kam blo waj daon lo Stade. Lo 79 minit blo gem, wan kona kik blo Erakor FC, i lukim bol hemi ribaon lo han blo kipa blo Galaxy FC mo hemi ko stret lo Loic Coulon wei kam blo savei equalize lo sekon haf bo gem. Gem hemi kam moa strong mo i lukim Galaxy FC hemi mestem fulap janis blo savei tekem lid bakeken. Erakor hemi plei wan difensif strateji blo savei holem taet Galaxy FC kasem ful 90 minit blo gem. Finol sko hemi 2-2.

Lo olgeta narafala updeit insaed lo PVFA 2019-2020 jampionsip, lo Fraedei 25/10/2019, i lukim Tafea FC hemi kam blo plei agensem Mauwia FC. Maj ia, i lukim Tafea FC hemi kam blo kasem namba tri wiin blo hem lo wan sko blo 3-1. Olgeta poen blo Tafea FC oli kam lo Alista Kalip, Cyril Leo mo Harrison Massing. Apal Nicko, hem nao hemi kam blo putum onli poen blo Mauwia FC.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.