Minista Saatearoto i putum ston faondesen blong multi-pepes kot long Emae

Minista blong yut developmen mo spot, Willie Pakoa Saatearoto(right) and CEO blong spots komisen, Mr Trevor Toka

Minista blong yut developmen mo spot, Willie Pakoa Saatearoto I putum ston faondesen mo seanbod blong multi- pepes kot long Tapakoro Ouchida stadium long aelan blong Emae long wik ia.

Long ofisiol toktok blong hem, Minista Saatearoto I talem se ston faondesen we hemi putum emi markem wan nara step long development long aelan blong Emae mo long sem taem konstituesi blong Shepeds outa aelan.

“Multi–pepes kot projek ia hemi blong olgeta yangala mo spotsman blong yumi long Shepeds outer aelan. Kot ia emi desaen blong tekem tugeta ol spots disaplin olsem, volley bol , basket bol, futsal, tenis mo han bol”, Minista i talem.

Minista i talem se multi- pepes kot ia bai hemi stap olsem wan open kot fastaem mo lukluk i stap blong mekem se stat long 2021 i go, bambae i gat upgrad i kam olsem wan evakuesen senta blong ol pipol I save usum long taem blong wan disasta.

Minista I gohed blong talem tu se plan blong gat wan multi- pepes kot mo wan evakuesen senta long sem taem hemi stap long plan blong kavman blong i mas gat long evri aelan long Vanuatu.

Long taem ia tu i witnisim handing ova blong ol spots equipmen (oli kam tu olsem sapot blong komiti blong 40th indipendens selebresen long Vila) i go long eria sekreteri blong hemi givim long wanwan eria kaonsel blong Shepeds outa aelan mo blong helpem ol yangafla blong oli tekem pat long ol spots kompetisen blong makem selebresen blong 40th anivesery.

“Mi wantem telemaot tu long yumi mo ol yangala blong yumi se tude emi wan milestone we afta 40 years blong Independence, wan spots minista i save putum pen long wan roadmap pepa blong divelopmen blong yut mo spot long Vanuatu. Mi glad se mi nao mi fes minista blong yut mo spot we mi saenem polisi blong divelopmen blong ol Yangfala throughout long Vanuatu”, Minista I talem.

Minista i gohed blong talem tankiu tu long ol pas kavman, ol foma ministas, Shefa provinsiol kavman mo ol funding patna, ol jif mo komuniti lida from ol gudfala wok mo sapot we oli stap mekem blong divelopem konstituensi stat long 1980 kasem yia ia, 2020.

Minista Saatearoto I talemaot se tetei namba blong ol yangfala blong yumi i bigwan bitim namba blong ol Man, Woman mo Pikinini long Vanuatu I mekem se kavman emi mas mekem evri wei blong helpem ol yangfala.

Long las toktok blong hem, Minista hemi givimaot wan rimaenda blong evriman I mas continue blong lisen long advaes mo instraksen we I kam long Ministry blong Helt i stap putumaot from ol sefti mesas blong COVID-19.

“Mi stap askem long yufala blong respectem ol Advaes mo Instraksens ia, taem yufala i stap tekem pat tugeta long ol difren spots aktiviti blong yufala. No foget blong washem hand oltaem”.

Minista I wishim everiwan wan hapi 40th indipendens anivesari,

I gat toktok blong tankiu tu I kam long ol rep long Emae mo long Shepeds outa aelan blong talem tankiu i go long Minista blong hemi save mekem fes visit blong hem I go long ol pipol blong hem. Oli talem se visit ia hemi olsem wan wining celebresen blong Shepeds outa aelan.

Delegesen we Minista I lidim I gat insaed, Mrs Martha Pakoa; Daerekta jenerol blong Ministri blong yut divelopmen mo Spot, Mr Henry Vira, CEO blong spots komisen, Mr Trevor Toka; 1st PA, Roger T. Agath; 3rd PA, Kethy George, Joe Kalo olsem principal administrator blong National yut kaonsel; Ephrone Jack olsem Councilor blong Mataso/ Shefa Province mo Toara Pakoa olsem Black Stone Signboard Designer.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.