Mauriki FC developmen prokam i kasem wan impak

PVFA kompitisen maneja i stap handova relekesen trofi long Mauriki FC kapten, Nicholas King.

Mauriki FC we i aot long premia divisen afta long 5-6 yia, i kasem wan bigfala ajivmen yestedei tru long ol klab developmen prokram blong save kasem premia divisen long Port Vila Futbol Asosiesen (PVFA) 2021-22 sisen.

Hed koj blong Mauriki FC, Pastor Frank King i mekem toktok ia taem Mauriki FC i kam blong kwalifae i ko insaed long PVFA premia divisen afta i winim Seveners United FC long 1 nil yestedei long Port Vila Stadium.

Long fes releksen maj, Mauriki FC i win long 5-2 mo long sekon maj, yang tim ia i kam blong putum hed antap blong save kasem wan moa win yestedei.

Ps King i talem se longfala rod ia i no wan isi wan wetem fulap jalenj we tim i kasem mo i aknolejem God oltaem blong stap wetem ol boe insaed long wokbaot ia.

“Mauriki FC i kam blong bildim bak prokram blong em taem ol boe oli wan wan mo tim i kam blong karem seves blong ol yut we fulap nao ol unda 20.

“Tim i wan yang tim. Fulap long ol boe i kam aot long ol broken home, fulap i kat problem insaed long komuniti be me lukaotem olgeta olsem ol pikinini blong me.

“Me wantem aknolejem Papa God blong save sendem wan positif mesej tru long ol boe. No mata, sosaeti i luk daon long olgeta, be tedei oli prufum se oli save mekem mo talem aot se oli kat pepos tu long laef. Tedei ol boe ia i soem aot se olgeta i no man nating, be wan mesej blong viktri.

“Viktri tedei i no blong Mauriki FC nomo be hemi blong Mele komuniti blong save kat tu(2) tim insaed long PVFA premia divisen long nekis sisen. Ajivmen ia i prufum tu se Mele i kat fulap futbol prodak insaed long komuniti,” Ps King i talem.

Mr King i komen se insaed long premia divisen bambae i no wan isi rod be ol boe i luk fowod blong kompit mo sem taem gro tu.

“Tedei hemi wan dei blong viktri. Tabu tok blong God i talem se taem God i kam bifo long yumi, hu bae i agensem yumi. Ol taem bambae ol boe oli fokas long Bigman.

Ps King i stap ekstendem tok tankiu i ko long waef mo ol pikinini blong hem blong sapotem hem oltaem insaed long komitmen blong futbol. Hemi stap aknolejem tu ol famili insaed long komuniti mo jej tu blong save sapotem tim ol taem.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.