ABM Galaxy FC mo Tupuji Imere FC oli kam blong kasem fes win blong ol insaed long Port Vila Futbol Asosiesen (PVFA) 2020-2021 Vodafone premia jampionsip las Satedei daon long Port Vila Stadium.

Fes maj, Galaxy FC nao emi kam blong winim Mauwia FC long 6-2.

Mauwia FC nao hemi kam blong sko feswan tru long Kiriau Moffat stret long 9 minit blong fes haf. Mauwia FC hemi feil blong mentenem lid blong hem taem i lukim Galaxy FC kaonta atak, Andre Batick hemi kam blong ekwelaes long 16 minit blong maj.

Galaxy FC hemi kam blong bildimap presa slo slo long Mauwia FC saed mo i lukim atak midfilda blong tim, Roberson Filipe hemi kam blong putum sko long 2-1 stret long 20 minit. Long 40 minit, Filipe emi kam blong faenem net blong Mauwia FC mo putum sko long 3-1.

Insaed long sekon haf, Mauwia FC hemi kam blong bildap slo slo tru long ol kaonta atak strateji blong hem mo i lukim long 49 minit stret, Mauwia FC midfilda, Tord Pakito hemi kam blong putum wan moa poen mo putum sko long 3-2.

Mauwia FC hemi kontinu blong plei wan atak gem be i lukim olketa kaonta atak strateji we oli krietem oli no save faenem bol insaed long net blong Galaxy FC nomo afta long sam long ol gudfala difens we Galaxy FC emi mekem.

Galaxy FC hemi kam blong putum presa bigwan long Mauwia FC mo i lukim Galaxy FC midfilda, Filipe hemi kam blong muvum sko long 4-2 stret long 65 minit mo semtaem kasem wan fes hat trik insaed long 2020-2021 sisen ia. Galaxy FC hemi kontinu blong bildap long ol kaonta ataks blong em mo i lukim Yvong August hemi kam blong sko long 75 minit blong putum sko long 5-2.

Mauwia FC hemi kam blong faenem sam opotuniti blong save kasem sam mo poen be ol boes long red oli feil blong faenem wan brek in insaed long difens wol blong Galaxy FC anda blong seves blong Joseph Iaruel mo Jeffrey Tasso.

Galaxy FC hemi kam blong kasem wan mo janis taem i lukim midfilda, Evaristo Kapalu hemi sko stret long 84 minit mo semtaem silim fes win blong Galaxy FC long sisen ia. Finol wisel hemi blo mo sko emi stab long 6-2 lo feva blong Galaxy FC.

Sekon maj blong dei emi stap bitwin Erakor Golden Star FC mo Tupuji Imere FC. TI FC nao emi kam blong winim maj ia long 4-3.

TI FC we hemi kam namba faev long 2019-2020 sisen hemi kam blong displei wan gudfala futbol long foret blong olketa futbol sapotas daon long Port Vila Stadium.

Long 33 minit blong fes haf, TI FC midfilda, Donald Napat nao hemi kam blong openem sko blong tim.

TIFC straeka, Azariah Soromon hemi kam blong sko long 36 mint mo putum sko long 2-0.

Long sekon haf, TI FC straeka, Alex Saniel hemi kam blong muvum sko iko long 3-0 tru long wan naes kona sut we i lukim Saniel hemi hedem bol iko stret insaed long net blong EGS FC.

Stret long 69 minit, wan moa kona kik we i lukim TI FC kaonta atak, Soromon hemi kam blong skorem namba tu poen blong hem taem hemi kam blong hedem bol iko insaed long net mo putum sko long 4-0.

EGS FC hemi kam blong bildap slo slo mo i lukim Norman Kency hemi kam blong skorem fes poen blong tim long 84 minit. EGS FC hemi no lusum hop mo hemi kontinu blong putum presa bigwan long TI FC mo i lukim Japhet Toukone hemi kam blong muvum sko iko long 4-2 stret long 91 minit.

Long 93 minit blong gem, TI FC difens wol hemi feil blong distebem olketa kaonta atak strateji blong EGS FC mo i lukim Loic Coulon nao hemi kam blong skorem las poen blong EGS FC. Finol sko 4-3 long feva blong TI FC.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.