Galaxy FC hemi topem dei 2 blo PVFA 2019-2020 jampionsip

Galaxy FC scored 10-0 against Mauwia FC. (FB)

Olgeta Port Vila Futbol Asosiesen (PVFA) premia lik gem oli bin kik of las Satedei mo i lukim 3 maj oli bin tek ples daon lo Stade eria. Lo fes gem blo dei i lukim Siaraga hemi kam blo winim Tupuji FC lo 4-0. Sekon maj I lukim Tafea hemi winim Yatel FC lo 3-1. Lo las maj i lukim Ifira mo Erakor oli traem bes blo kasem wan poen beh olgeta difens wol blo tutgeta tim oli no alawaem eni bol blo ko pasem net.

No mata lo rabis weta, Siaraga FC wei hemi kam blo lusum fes maj blo hem agensem Tafea FC las Satedei, hemi kam blo mekem fes win blo hem lo jampionsip ia agensem Tupuji FC. Siaraga FC, hemi wan lo olgeta klab lo Port Vila wei i lukim tu fulap long olgeta niu talent futbol pleia oli savei kam blo joen wetem. 4-0 hemi fultaem sko mo i lukim Luke Moli hemi skorem 1 poen, Jason Bule wetem 2 poen mo Noel Maki wetem wan poen.

Lo sekon maj, Yatel FC hemi putum wan gudfala muv lo fes haf taem hemi kam blong tekem lid tru lo wan poen blo Nathan Teidoka. Tafea FC hemi traem bes blo equalize insaed beh olgeta difens wol blo Yatel FC hemi no alawem eni bol blo hemi ko tru lo net. Sekon haf emi kik of mo i lukim Tafea FC hemi kam blo presa bigwan blo savei kasem wan poen. Tafea #9, Jordy Tasip hemi mekem fulap janis blo sko bei ino savei kasem finis wei hemi wantem. Alista Kalip, wan lo ol top straeka blo PVFA hemi kam blo equalize blo Tafea afta wan Yatel difenda hemi mestem bol lo foret blo penalty box mo i lukim Kalip emi kam in blo mekem wan pawaful sut blo savei putum sko lo 1-1. Lo 35 minit insaed lo sekon haf, wan takel wei kamaot lo wan Yatel difenda i lukim refri hemi kivim wan penalty sut i kolo Tafea FC, mo Waiwo Kalmet nao hemi kam blo putum Tafea FC lo 2-1. Wetem fulap janis blo Yatel FC blo equalize, ol boe oli no bin savei putum bol insaed lo net. Lo las 40 minit blo gem, Jordy Tasip, emi kam blo silim viktri blo Tafea FC afta lo wan pawaful sut wei Yatel golkipa emi feil blo kasem bol mo i lukim bol emi ko insaed lo net. Finol sko, 3-1.

Las maj blo dei i lukim Erakor FC wetem Ifira FC oli displei wan gud futbol gem truaot lo full 90 minit, bei nogat wan team hemi savei kasem wan poen. No mata lo ol strateji wei ol koj blo tugeta tim oli bin usum, tru lo ol kaonta atak mo difensif, ol pleia oli no savei kasem wan poen nomo. Wetem fulap lo ol skillful pleias lo tugeta saed, mo ol gudfala set ap, gem hemi bin strong tumas lo fes mo sekon haf blo gem. 0-0 hemi finol sko blo maj.

Lo ol nara updeit, lo Fraedei las wik, Galaxy FC emi stap mentenem lid lo tebol naia, afta emi kam blo winim Mauwia Fc lo wan sko blo 10-0. Galaxy FC hemi kam blo winim Yatel FC 14-0 lo fes maj blo hem lo 2019-2020 jampionsip ia. Lo gem blo Galaxy FC agensem Mauwia FC, i lukim Kensi Tangis hemi skorem 3 poen, Henry Manasseh wetem 2 poen, James Naka- 2 poen, Gabriel-2 poen mo Roberson Dos Santos-1 poen.

Win ya emi mekem Galaxy hemi stap topem pool naia, folem wetem Tafea FC olsem rana ap blo hem.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.