Erakor Golden Star FC hemi aot long resis

BSP Amicale kapten, Octav Meltecoin (left) mo Abed Vanva oli selebretem wining poen blong Octav long Mande

Erakor Golden Star FC olsem jampion klab blong Vanuatu hemi aot long 2020 OFC Champions League, afta we las wiken i lukim oli kam blong lus agensem wan strong BSP Amicale saed long 2-1.

Long Easter Mande long Port Vila Stadium, i lukim Port Vila Football Assosiesen Top 4 i bin kik off.

Fes maj blong dei, MG Tafea FC oli kam blong lusum maj blong olgeta long 2-0 agensem Galaxy FC.

Olgeta poen long maj ya i kam thru long Kensi Tangis mo Bong Kalo long fes haf nomo.

Long sekon haf, MG Tafea FC oli bin dominet be oli no save faenem wan wei thru nomo blong faenem bak saed blong net blong Seloni Iaruel.

I mekem se faenol sko, MG Tafea 0 mo Galaxy 2.

Stret afta long maj ya President blong Tafea FC hemi draftem wan leta blong komplen abaot Bong Kalo se hemi no ‘eligible’ blong plei long tunamen ya from hemi plei long moa long 3 klab long wan sisen.

Be Daily Sports i andastan se bifo maj hemi kik off i bin gat wan Teknikol Miting i tekem ples blong oli kliarem olgeta long olgeta isiu olsem kes blong Bong Kalo. Galaxy FC oli bin karem konfemesen long Bong Shem we hemi Vanuatu Football Federation Competition Manager, se Bong hemi ‘eligible’ blong plei, i mekem Galaxy FC i yusum hem.

Follem komplen leta ya, Daily Sports i toktok wetem President blong PVFA, Stephen Felix, mo hemi advaesem se tede moning bambae Independent Body we olgeta i apoentem blong lukluk long komplen ya bambae hemi kamaot blong givim ansa blong hem.

Long sekon maj blong dei ya, olgeta defending jampion oli fol aot long resis blong wan ples insaed long 2020 OFC Champions League, taem we wan las minit poen blong Octav Meltecoin hemi putum Erakor Golden Star FC aot long kompetisen.

Tufala klab ya i bin stap kitkit long 1-1, be wetem 4 minit adisonol taem i stap, Octav hemi silim semi faenol spot blong BSP Amicale FC.

Semi faenol bambae hemi kik off long wiken ya long 2pm stret long Port Vila Stadium.

Raymond Nasse

Sports Editor

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.