Futbol

Malampa blong faenol wetem Amicale tede long 2pm

Olgeta niufala hero blong Northern Region, olgeta histri meka, Malampa Revivors oli wan klab we oli jas fom ino longtaem, be wetem smol histri we oli gat, oli ajivim plante finis long shotfala wokbaot blong olgeta.

Malampa Revivors hemi bon stret long namba 8 Oktoba long 2010, stret long BP Bon Church.

Pepos blong fomem klab ia, hemi blong bildim ap ol yamgfala raon long Luganville mo Santo long Christian laef blong olgeta mo balansem wetem futbol.

Stret long 2011 klab hemi kam blong afiliet wetem Luganville Football Association (LFA), olsem wan self sponsored tim wetem wan wan help blong sam praevet kampani mo sam lokol bisnis man.

Long spes blong 4 yia nomo, klab ia hemi putum aot wan ‘impressice resume’, we risal blong hadwok blong olgeta ia i lukim aotkam blong hem nao hemi upset we oli bin mekem long Wednesday agensem Ifira long Telecom Vanuatu Limited (TVL) National Super League (NSL) semi faenol.

Apiarens blong olgeta TVL NSL semi faenol hemi no festaem blong olgeta long stej ia, from long las yia oli bin mitim Amicale long Port Vila Stadium, mo oli bin lusum maj ia long 7-0, be risal long Wednesday i soemaot se long yia ia Malampa hemi minim bisnis.

Long NSL long Northern Region long yia ia, Malampa hemi toppem Northern Region, we hemi kwalifaem hem blong plei long semi faenol wetem Ifira.

Long shotfala histri blong Malampa, i lukim oli prodiusum sam long olgeta nasonal pleia mo oli even sendem sam long olgeta top pleia blong olgeta i kam helpem kampen blong olgeta blong oli kwalifae from NSL mo oli avoedem relegesen.

Christopher Andrew, Claude Aru mo kapten John Alick nao oli olgeta trifala pleia ia.

Las yia Erakor Golden Star hemi saenem wan Sister City klab agrimen bitwin tufala klab, we hemi alawem olgeta pleia blong tufala klab i muv fri in and aot long tufala klab ia.

Sem grup blong olgeta pleia we oli bin stap wetem klab long dei 1, nao oli stap iet wetem klab kasem tede sins 2010.

Malampa Revivors hemi wantem talem bigfala tankio i go long Vanuatu Football Federation mo LFA long sapot long olgeta tunamen we i bildim klab i kam long stej blong hem tede.

Klab i wantem talem tankio long olgeta fan, sponsa, bisnis haus mo wan wan man we i pushum hand long poket blong hem blong karemaot smol mane blong bread blong family blong hem mo givim i kam long klab, long help blong olgeta, from witaot olgeta help ia, klab bambae i no save stap long stej we hemi stap long hem tede.

Klab hemi wantem talem las tankio blong hem i go long God, from Malampa Revivors hemi no abaot futbol, be hemi abaot laef wetem God.

Hemia nao olgeta ajivmen blong klab stat long 2011 taem oli joenem LFA:

2011/2012 sisen namba 4 ples (4 ball)

2012/2013 sisen namba 2 ples (Vt80,000)

2013/2014 sisen namba 2 ples (Vt80,000)

2014/2015 sisen wina (Vt130,000)

Independence Cup 2013/2014 sisen wina (Vt100,000)

Brisk Cup 2013 wina (Vt100,000)

Brisk Cup 2014 wina (Vt100,000)

LCM Cup 2014 namba 3 (Vt30,000)

LCM Cup 2015 namba 2 (Vt80,000)

Tede Malampa hemi krietem wan moa histri long Luganville blong hemi mekem festaem eva we long Luganville Soccer City Stadium i gat wan klab blong LFA 90 minit i seperetem hem from wan ples insaed long Oceania Champions League spot, mo hemi mekem tu festaem we Luganville i lukim wan grand faenol blong oli plei from wan cash praes blong 1 milien vatu.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.