Futbol

Classic Signs afta long handing ova blong olgeta shirt long nasonal tim yestede aftanun

I no everi dei we Vanuatu i save hostem 2 intanasonal frenli blong olgeta man mo woman long wan semak dei.

Tede namba 14 Novemba bambae hemi go daon long histri olsem festaem eva we Vanuatu hemi stap hostem 2 intanasonal frenli blong man no woman senior team.

Tede long 11am bambae olgeta woman oli plei Papua New Guinea we hemi stap travel i go blong go daon long Oceania Nations Cup long New Caledonia.

Maj ya bambae hemi wan gudfala test blong olgeta woman sins bambae hemi festaem we Gold Medalist tim blong Mini Games bambae hemi pleiem senior team blong Papua New Guinea, we olsem yumi everiwan i save se, afta long New Zealand hemi Papua New Guinea long futbol tede.

Maj ya nao bambae yumi save talem se futbol blong yumi i stap long wanem level naoia, from yumi testem stret pawa blong futbol pawa haus ya.

Long tede long 5pm, bambae Vanuatu senior mens team oli pleiem New Caledonia bageken olsem fes maj long Korman Stadium.

Sekon maj blong senior team blong olgeta man, bambae hemi stap long 3pm Sarere ya long Korman Stadium, bageken wetem New Caledonia.

Vanuatu hemi gat janis blong mitim ‘neighbor’ blong hem New Caledonia we oltaem hemi stap givim janis blong tufala i plei long home graon long Vanuatu.

Las yia tufala i mekem frenli bifo Pacific Mini Games, we Vanuatu i winim tufala frenli ya.

Daily Sport i mitim Hed Koj, Robert Yelu long yestede aftanun mo hemi talem se tim hemi wan gudfala tim mo olgeta bambae i go traem every best blong olgeta blong save mekem wan gudfala tede mo long Sarere.

Olgeta ovasi pleia oli tajdaon finis blong joenem tim.

“Mi mo team i wantem talem bigfala tankio i go long olgeta sponsor we oli save backem up tim, no forgetem Classic Printers we oli kamaot blong save sponsarem tim wetem sam shirt we mifala i save werem aotsaed long fil, Hed koj Yelu i talem.

“Mifala apresietem we oli kamaot kwiktaem blong soem sapot, from hemia i no festaem we Classic hemi kamaot blong sapotem futbol long kaontri, tankio tumas Classic Signs blong save mekem hemia i happen.”

Daily Sport i bin mekem askem abaot gate se hemi hamas mo rispons i lukim, long everi frenli blong olgeta man, Grandstand hemi Vt500 mo Open Air Seat hemi Vt300.

Long maj blong olgeta woman tede long 11am, Grandstand hemi Vt300 mo Open Air Seat hemi Vt200.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.