Football

Olgeta pleia oli selebretem sekon poen blong Tony Kaltak long Tuesde agensem Tahiti

Vanuatu hemi kam blong winim fes hom intanasonal gem blong hem anda long niufala koj, Paul Munster long Tuesde naet, wetem wan 2-0 win ova long Tahiti.

Hemi festaem bageken long histri blong futbol blong Vanuatu we Vanuatu hemi kam blong winim Tahiti long hom graon long Tuesde evening, long fored blong ova 2000 sapota we oli kam blong wajem intanasonal frenli ya.

I bin gat smol ‘controversy’ bifo maj ya hemi kik off weta Vanuatu bon foma A League pleia, Mitch Cooper pepa blong hem i stret blong hemi save plei wetem Vanuatu sins hemi bin wantaem plei long Australia U17 seleksen.

I tekem wan full dei blong olgeta fan i jas faenem aot sam haoa nomo bifo Vanuatu i plei Tahiti se Cooper bambae hemi mekem intanasonal debut blong hem wetem Vanuatu.

20 minit bifo maj hemi kik off, grandstand hemi fas long olgeta fans blong Mitch Cooper, mo oli no go bak wetem ani disappoenmen from Cooper nao hemi Man of the Match yestede.

Cooper hemi setem ap fes poen thru long wan kona kik long fes haf we i lukim Jeffery Bob hemi putum i go insaed long net. Bob tu hemi mekem fes intanasonal apiarens long hom graon mo hemi pruvum hem wan se i no wan mistek nating oli putum hem insaed long fes 11.

Sekon poen i kamaot bageken long wan kona kik, we i lukim Tony Kaltak hemi semi volley long bol ya i go insaed long wan empty net, long medel blong sekon haf.

Tugeta poen ya i kamaot long olgeta ‘set piece’ we i minim se anda long niufala Hed Koj, Paul Munster, olgeta trening blong set piece long praktis, tim i bin kasem, be ‘overall’ gem plan nomo oli nid blong wok moa blong kasem.

Munster hemi bin singaot plante long olgeta pleia long wan sikness blong futbol blong Vanuatu we i lukim wan pleia i wantem trikim 2 o 3 man, mo hemi mas singaot strong i go insaed long fil blong remindem olgeta olgeta pleia blong passem bol o mekem wan taj, be no ron wetem bol.

Cooper hemi talem afta long maj se konsentresen blong olgeta boe i mas impruv blong olgeta i save muv fowod, be gudfala samting se oli ajivim aim blong olgeta we hemi wan win.

Cooper hemi talem se olgeta boe no mas plei aotsaed long gem plan be oli mas follem gem plan, mo hopefully long nekis maj wetem Fiji bambae yumi save luk wan jenis long ples ia.

Hed Koj Paul Munster i talem se hemi glad wetem pefomens blong olgeta boe, be hemi biliv se oli shud skorem moa poen, espeseli long fes haf.

Munster i talem se gem blong hem wetem tim long Solomon Islands i kam long wan taem we hemi no save gud olgeta pleia blong hem, be naoia hemi gat sam pikja finis blong whu nao olgeta pleia blong hem mo hemi talem se i gat sam pleia we oli no joenem tim yet.

Munster hemi talem se Christophe Gamel hemi mas wari long seleksen blong hem afta long pefomens we Vanuatu i mekem agensem Tahiti.

Kapten Brian Kaltak hemi aknolejem olgeta fans mo askem olgeta blong kam plante long Mande nekis wik taem oli pleiem Fiji.

Nekis maj blong Vanuatu hemi stap long namba 10 June long Mande nekis wik agensem Fiji.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.