Unelco Cup long namba 19 January

From taem hemi no alawem blong tufala klab blong New Caledonia mo Solomon Islands oli kam daon blong plei wetem tufala Vanuatu jampion, Nalkutan FC mo Erakor Golden Star FC we oli stap pripea naoia from Oceania Champions League, i mekem se Port Vila Football i jenisim tingting.

“From taem hemi no stap long saed blong yumi, i mekem se mi go long Unelco blong toktok wetem olgeta sapos oli save sponsarem yumi long wan ‘pre-season cup’ we bambae yumi singaotem Unelco Cup,” President blong Port Vila Football Association (PVFA), Stephen Felix i talem.

Felix i talem se Unelco hemi agri finis blong sponsarem tunamen ya we fomat blong hem bambae PVFA i jas kamaot blong anaonsem afta we oli faenolaesem everi samting.

Unelco Cup ya bambae i lukim Unelco hemi givim Vt600,000, mo bambae olgeta klab long premia divisen oli plei from.

“Vt600,000 ya nao bambae Unelco i givim blong oli ranem Unelco Cup we bambae hemi stat long namba 19 January mo finis long namba 2 February.

“PVFA hemi disaedem blong oganaesem tunamen ya we bambae i karem everi 8 premia klab mo Nalkutan FC, blong oli plei from Cup ya mo semtaem priperem Erakor mo Nalkutan from Champions League.

“Tufala faenolist nao bambae oli wok awei wetem praes mane we bambae mifala i jas kamaot blong anaonsem, mo wina i go wetem Cup,” President blong PVFA i talem.

Mane blong gate we bambae oli mekem long tunamen ya bambae oli givim olsem ‘bonus’ i go long Erakor mo Nalkutan blong helpem tufala long olgeta ekspens blong tufala long taem blong Champions League.

Long nara nius yestede, James Naka mo Nelson Sale oli kam blong helpem Nalkutan FC wetem kampen blong olgeta.

Joses Nawo bambae i jas kam daon long Tasde.

Trifala Solomon intanasonal ya oli kam blong helpem Nalkutan FC wetem Champions League kampen blong hem.

Hemia bambae ya we tufala ‘seasoned’ pleia oli testem fil blong Champions League, mo Nalkutan i hop se wetem tufala eksperiens pleia bambae oli save go long we wetem kampen blong olgeta nekis manis.

Nalkutan i stap tren mo kamp lo Teouma Academy naoia.

Raymond Nasse

Sports Editor


(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.