Naoia we olgeta futbol aktiviti raon long Vanuatu espeseli long Port Vila Football Association (PVFA) hemi spell blong Krismas mo Niu Yia, olgeta futbol pleia bambae i no longtaem oli go bak insaed long fil.

From we long sisen we i pass PVFA hemi bin stap ron aotsaed long kalenda blong OFC/FIFA from long wan aotstanding kes blong Shepherds United mo Siaraga we i lukim olfala Eksekiutif i no save dilim, i mekem se niufala Eksekiutif hemi disaedem blong kipim 9 tim long premia las sisen ia.

Kes blong Siaraga mo Shepherds i bin hollem taet olgeta futbol aktiviti blong samfala manis we i lukim PVFA hemi nogat eni futbol aktiviti plus antap long dilei ia i lukim OFC U20 World Cup Qualifier bageken long Port Vila long manis September, i mekem se jampionship blong niufala sisen ia bambae oli kik off long hem stret long namba 21 January.

PVFA Eksekiutif hemi agri long deit ia finis blong jampionship hemi kik off long hem, January 21 2017, we i min se naoia i go olgeta klab oli gat 3 wik nomo blong priperem niufala tim blong olgeta from niufala sisen ia.

Hemia i min se naoia i go bifo Niu Yia, olgeta klab oli stap faet finis blong faenem wan niu blood blong kam helpem kampen blong olgeta long niufala sisen ia, naoia we transfer window hemi open i stap.

PVFA kalenda afta long 21 January i lukim Eksekiutif hemi agri blong i nogat wan Opening Knockout, we i min se jampionship hemi kikim off kalenda blong PVFA mo long manis February bambae i lukim Grand Casino Cup we bambae i lukim A League klab Western Sydney Wanderers oli kam daon blong pleiem Digicel Amicale mo hopefully olgeta PVFA jampion mo Champions League Representatif, Erakor Golden Star, mo Non Communicable Disease Cup long manis June mo July, we Ministry blong Health nao bambae hemi sponsarem.

NCD Cup bambae hemi stap olsem las tunamen blong PVFA bifo end blong niufala sisen ia.

Wetem anaonsmen ia i lukim sapos i nomo gat eni distebens long program blong PVFA, bambae PVFA hemi foldaon bageken insaed long kalenda blong OFC mo FIFA.

Olgeta futbol fan oli no mas fogetem tu se nekis yia long manis Disemba bambae Port Vila Stadium tu i hostem sam maj blong futbol hemia blong 2017 Pacific Mini Games.

Long nara nius blong futbol, AS Central Sport we bambae oli representem Tahiti long Oceania Champions League oli sendem finis rikwes i kam blong Vanuatu Football Federation from transfea blong Kensi Tangis mo Fenedy Masauvakalo olsem wan loan, we bambae i lukim tufala i kambak long Digicel Amicale afta long namba kampen blong Central Sport.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.