No konfemesen se Wednesde maj hemi FIFA ranking: Shem

Sarere wiken ya bambae Vanuatu mo New Caledonia i wokbaot i go insaed long fil bageken. Photo: FCF Facebook

Long fored blong wan grand stand we kolosap i sold aot, Vanuatu nasonal senior team hemi kam blong pleiem wan New Caledonia saed long Wednesde aftanun.

Vanuatu hemi statem fes 11 blong hem wetem kolosap 5 fes cap pleia we i minim se hemi festaem oli plei long wan senior intanasonal frenli.

New Caledonia nao hemi openem sko long medel blong fes haf taem straeka Antoine Roine we hemi festaem long seleksen tu, hemi faenem spes bihaen long las man afta long wan longfala aerial bol we i putum daon bol mo faenem baksaed blong net.

Stret afta long poen ya Vanuatu hemi riplae bak, be Kency Tangis i no save putum inaf pawa long hem blong bol ia i go insaed long net.

Fes haf New Caledonia 1 mo Vanuatu 0.

Sekon haf i stat Vanuatu i jenisim tide blong fes haf i kam long feva blong olgeta.

Vanuatu i bin gat janis blong faenem net mo long 5 taem, be oli no save konvetem olgeta janis ya nomo.

New Caledonia oli faenem aot se oli nomo save mekem, i mekem oli mas karem sam yelo kad blong traem distebem presa blong Vanuatu.

Taem we fourth official hemi indiketem se 6 minits adisonol taem, Vanuatu difenda, Brian Kaltak oli foulem hem insaed long penalty box, mo hem wan yet i stanap blong tekem, be i lukim hemi leftemap shoot blong hem i fas long kros ba.

Maj hemi finis mo faenol sko, New Caledonia 1 mo Vanuatu 0.

Koj blong New Caledonia Sardo Thierry hemi talem se from AS Magenta hemi pleiem Coupe de France , i mekem se plante long olgeta top pleia blong hem we oli stap plei long klab ya oli stap, klab i no save rilisim, i mekem se hemi kam wetem plante olgeta niu mo yangfala pleia.

Thierry i talem se, fes haf olgeta i plei gud futbol be long sekon haf Vanuatu i jas dominet nomo fisikli mo mentally, i mekem se sekon haf ya i had tumas long olgeta, be bambae oli traem jenisim hemia long wiken ya taem oli mit bageken.

Vanuatu hed koj, Robert Yelu hemi taem se fes haf tufala i serem ikwel posesen long bol be long sekon haf oli dominet be oli no save sko.

“Hemi festaem we mi stap wetem nasonal tim olsem hed koj, mi laenem plante samting mo mifala hop blong baons bak long wiken ya.”

Vanuatu hemi pleiem New Caledonia long wiken ya long Korman Stadium stret long 3pm.

Daily Sport hemi askem long VFF weta maj ya hemi wan FIFA Ranking maj long Wednesde ya, be Competition Manager we i jas sendem olgeta risal i go yestede long FIFA i se hemi no save konfemem hemia yet.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.