Futbol

Justin Ngwele (medel yellow) blong Indigene Law Firm i stap handem ova Vt100,000 mo olgeta kaikai i go long Acting Tim Maneja blong Nalkutan FC, Silas Yakar. Foto tu i soem Nalkutan FC koj, Moise Poida mo kojing staff wetem olgeta staff blong Indigene Law

Nalkutan FC we naoia oli stap camp mo tren naoia long Teouam Academy oli stap go thru long olgeta endurance fitness program naoia.

Hemi sekon taem long 2 yia we wan klab aotsaed long Port Vila Football Association (PVFA) hemi kwalifae from Oceania Champions League.

Las yia taem we Nalkutan hemi kwalifae from Champions League mo semtaem winim olgeta foma jampion blong Vanuatu, Erakor Golden Star FC, oli mekem histri olsem fes klab aotsaed long PVFA we hemi kam jampion klab blong Vanuatu.

Olgeta jampion blong Tafea Football Association ya oli sendem tim blong olgeta naoia oli stap long camp long Teouma Academy.

Long Tuesde i lukim Solomon Islands intanasonal, James Naka, hemi kam go insaed long camp mo bambae i lukim tufala nara Solomon Intanasonal, Joses Nawo mo Nelson Sale, bambae oli joenem tim tu bifo wiken ya.

Olsem yumi everiwan i save se kost blong wan klab blong kompit long Oceania Champions League hemi ekspensif, afta we klab hemi kam aot long wan rurol assosiesen, i mekem se klab hemi open long eni help.

Fes help we klab hemi risivim long Tuesde aftanun taem we Indigene Law Firm oli kam blong handem ova 4 bag rice mo 2 carton chicken wings mo Vt100,000 i go long hand blong Nalkutan Acting Tim Maneja, Silas Yakar.

“Mifala kam tede blong givim smol kaikai nomo mo mane blong helpem tim long, mo mifala wantem talemaot nomo se from yumi stap plei long hom graon, Nalkutan FC hemi karem full sapot naoia blong Indigene Law Firm naoia go kasem Champions League i end,” Boss blong Indigene Law Firm, Justin Ngwele i talem.

Long toktok blong hem Yakar hemi talem tankio long help mo bambae hemi mo tim i mekem gud yus long help ya mo hemi talem tankio se wan lokol law firm olsem hemia i save kamaot blong helpem wan lokol klab.

“Nakamal blong yumi long Lowniel Apen long Tanna, bambae mi passem mesej i go long olgeta long wanem yu mekem tede blong klab, mo eni taem u kasem Tanna, bambae Nakamal i jas talem tankio blong hem long yu, be tede mi stanap blong talem tankio long bihaf blong everiwan,” Yakar i talem.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.