MP Jotham Napat mo Galaxy President Jackson George oli sitaon wetem ol ofisol mo pleia blong Eastern Nisia FC

Wan long olgeta niu klab insaed long VFF National Super League Pool D kompetisen we bambae hemi stat tete long Korman Stadium hemi Eastern Nisia FC we hemi jes bon long yia ya.

Eastern Nisia FC hemi wan niu klab we hemi kamaot long eria blong White Sands we hemi stap long eastern pat blong Tanna, mo klab ya hemi gat insaed fulap yang talent we bae hemi fes taem blong oli travel aot mo play futbol.

“Weta hemi futbol o wan nara sports disaplin, yumi olgeta pleia mo olgeta tim ofisol I mas respectem evritaem olgeta rules blong sports disaplin we yu wandem representem,” hemia hemi enkarejmen toktok blong MP Jotham Napat iko long olgeta klab ofisol mo pleia blong Eastern Nisia FC.

MP Napat hemi mein sponsa blong klab ya tuwods long tunamen ya afta we hemi pem evri travelin arenjmen blong klab ya blong kam tek pat long tunamen ya.

Long Teouma Football Academy yestete aftenun, MP Napat hemi handem ova wan ful set blong uniform mo ol sus iko long olgeta ofisol mo olgeta pleia blong Eastern Nisia FC.

Long sem taem ya Galaxy FC President, Jackson George hemi bin kam blong handem ova wan mo new ful set blong uniform iko long olgeta klab ofisol long behaf blong Andrew Leong wetem eksekutif blong Galaxy FC.

Wetem olgeta handin ova we oli tekem ples yestete, manejmen blong Eastern Nisia FC hemi talem bigfala thanku iko long MP Jotham Napat mo Galaxy FC from hat we oli gat tuwods gem ya futbol mo blong save sponsarem klab ya long tunamen ya.

Hemi talem tu se handin ova ya hemi bigwan tumas long klab, mo bambae klab hemi putum evri best blong olgeta blong gat wan gud resal long tunamen ya mo blong oli save muv iko long nekis stej blong tunamen ya.

Tim maneja blong klab hemi stap apil tu iko long every man White Sands long Tanna we oli stap long vila blong kam sapotem ol yangfala pleia ya tete long aftenun taem oli plei fes gem blong olgeta long 6pm wetem Vatukei FC long Korman Stadium.

Eastern Nisia FC bambae hemi plei namba tu gem blong hem long Tuesde 13 Novemba wetem Nuvi FC long 12pm mo las gem blong olgeta bae oli plei wetem Milo FC long Tasde 15 Novemba long 1pm long Korman Stadium.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.