Long las wik moa long 100 man i kam blong welkamem bak yangfala hero mo lokol boy blong Bosahe Sekta One long eria blong West Malo, Denly Ben, afta we hemi kambak long U-20 FIFA wol kap.

Hemi fes taem we Vanuatu i go long wan FIFA wol kap mo semtaem tu Malo aelan praod from boy blong hem i stap insaed blong representem Vanuatu. Denly Ben hemi stanap long wan height blong 1.75 m we hemi wan gudfala height long standard blong FIFA mo i werem namba 13 mo stanap olsem Centre Defence blong U-20 team we i representem Vanuatu long wolkap long Saot Korea.

Taem we bot I stap kam soa, plante man i wait long sanbij blong welkam hem mo hangem salusalu long hem. Hemi wan bigfala hona mo I mekem se ol yut blong Sekta One oli bin lidim yangfala boy ia stat long pasis kasem long haos blong hem, mo long evri vilij hemi passem pipol i wait blong gritim hem mo hangem salusalu.

Denly Ben hemi wan yangfala boy blong 20 yia mo i stat plei taem I gat 16 yia nomo. Bosahe Sekta One i mekem bigfala lafet long taem ia blong welkamem bak pikinini boy blong hem.

Long lafet ia, fulap spij i kamaot blong talemaot ol gudfala fasin blong boy ia. Denly i wan boy we I lavem futbol tumas mo olsem ol koj blong hem oli talem, nomata we i nokat boy long fil long everi aftanun, Denly hem wan i stap long fil blong eksesaes, ron raonem fil mo trenem hem wan. Hemi wan boy tu we I kat rispek mo i no tajem alcohol, kava mo sigaret.

Taem we news team i askem from wanem hemi plei gud tumas, Denly I ansa kwaet nomo se “from heart blong mi i lovem futbol”. Hemi kohed blong talem se samting ia nao I mekem blong hemi stap muv fowod.

Taem hemi stap sherem eksperiens blong hem, Denly i talem se trifala tim we oli bin fesem bifo oli kambak long Vanuatu hemi ol strong tim tumas mo oli ol kantri we oli well-known long saed blong futbol. Be nomata long hemia, hemi bilif strong mo prea long papa God blong kivim hem karej mo strength taem I stap insaed long fil.

Bifo long wol kap i stat Denly i bin stap long Singapore be afta we oli faenem aot se hemi kat injury (boila long body blong hem), koj i mas sendem bak hem i kam hom from hemia i soem se hemi no helti, according long standard blong FIFA.

Nomata, afta we wol kap i on mo wan maj i pass, Denly i bin risivim wan kol long Vanuatu Football Federation (VFF) blong ko joinem tim Vanuatu long Korea.

“Blong patisipet long wol kap i no wan isi samting, hemi had be yumi mas putum trust blong yu long big man nomo mo putum evri efot blong yu long sport discipline ia,” Denly I talem.

Hemi stap talem bigfala thank you long Vanuatu gavman blong save mekem I posibol blong Vanuatu I tekpat long U-20 wol kap mo stap enkarejem ol yangfala truaot long Vanuatu mo espeseli nao ol yut blong Bosahe Sekta One blong play wetem spirit mo heart blong futbol mo neva blong fogetem papa God.

Hemi kohed blong talem se hemi bin pruvum taem I luk ol bigfala kantri raon long wol oli krae taem oli lusum gem mo hemia I soemaot heart mo love blong olgeta from futbol.

Long okesen ia, ol invaeted guests I lukim i kat olgeta big man olsem Vice President blong Luganville Football Association (LFA), Barthelemy Ngwele, Foma MP George Andre Wells, Principal blong Nandiutu Bilingual Junior Secondary School, mo ol narafala koj we oli bin trenem yangfala Denly taem i statem karia blong hem long futbol.

Hemi bin statem karia blong hem taem i joinem lokol tim blong West Malo mo ko joinem Santos FC mo i kohed blong kasem wol kap.

Narafala brata blong Denly hemi Yoann Ben we i bin representem Vanuatu taem oli go plei long Singapore long 2013.

Long nara nius yet long wol kap, Vanuatu kapten, Bong Kalo hemi stampem nem blong hem olsem wan long olgeta top 10 gol skora long 2017 FIFA U-20 World Cup.

Kalo hemi kontiniu long fom blong hem long Port Vila Football Association wetem 2 poen long 2 maj afta we i kambak long FIFA tunamen ya.

Vanuatu kapten ya hemi topic blong fulap rijinol mo wol media mo hemi mekem wanem we hemi talemaot long wol insaed long fil long trifala maj blong Vanuatu, olsem wan tru kapten mo lida.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.