Futbol

Evaristo Kapalu (medel) hemi selebretem poen blong hem las wiken

By Raymond Nasse

Opening dei blong 2017/2018 sisen blong Port Vila Football Association premia divisen jampionship long Fraede las wik mo long Sarere las wiken i lukim sam interesting risal.

Opening maj long Fraede las wik i lukim Ifira Black Bird FC i kam blong winim Erakor Golden Star FC long wan sko blong 3-1.

Ifira President, Nato Taiwia, long Sarere insaed long Port Vila Stadium hemi kajap wetem Daily Sport mo hemi talem se win blong olgeta long Fraede i pushum moa tingting ia se bambae hem olsem President blong klab bambae hemi lukluk blong invest moa long olgeta lokol pleia.

“Long eksperiens long hamas sisen we hemi pass, klab hemi impotem olgeta pleia blong Solomon Islands, inkludum koj.

“Klab hemi bin invest bigwan long olgeta Solomon Island pleia, be naoia mi olsem President blong klab mi stap lukluk long nekis step, hemia blong rekognaesem olgeta lokol pleia blong mi stat offarem olgeta wetem gudfala salary,” Taiwia i talem.

“Long kes blong Lucien Hinge we naoia hemi go bak long Tafea FC, afta we hemi karem Ifira i go winim jampionship, klab i leko hem i go bak wetem tingting ia se mifala i no wantem hollem taet eni pleia, mo naoia wetem klab blong lukluk long samfala gudfala salary blong olgeta pleia, mi stap invaetem eni gudfala pleia blong kam joenem klab naoia we mifala stat blong offarem sam gudfala salary.”

Fes maj blong Sarere las wiken i lukim Tafea FC i kam blong winim Mauwia FC long 3-1.

Willie Kalo nao hemi openem sko blong Mauwia FC eli insaed long fes haf, be i lukim Zika Manuhi hemi faenem ikwalaesa blong Tafea FC mo semtaem konvetem wan penalty jas bifo fes haf i finis, blong putum sko long haf taem long Tafea 2-1 Mauwia.

Long medel blong sekon haf, Evaristo Kapalu hemi addem namba 3 mo faenol poen blong maj, mo semtaem winim maj ia blong klab blong hem.

Win blong Tafea ova Mauwia hemi festaem sins las sisen long jampionship, we Tafea hemi no save winim klab blong Emau ya.

Sekon maj blong wiken i lukim Digicel Amicale FC i kam bihaen blong dro wetem Siaraga FC long 1-1.

Siaraga nao hemi openem sko thru long Peter, we hemi mekem wan longfala lob, afta we Amicale kipa, Andreas Duch hemi kam aotsaed long box.

Amicale hemi faenem ikwalaesa thru long wan kona, taem we Robin hemi stanap hemwan long las pos mo tapem bol i go insaed long wan empty net.

Las maj blong dei bitwin niufala kama long premia divisen, Shepherds United mo Tupuji Imere, i lukim Tupuji i kam blong win long 2-1.

Fes haf sko i stap long 1-1, afta we Rodney Serveux hemi faenem net blong Shepherds eli insaed long sekon, bifo Yvong August hemi hedem ikwalaesa blong Shepherds.

Long sekon haf, Don Mansale hemi konvetem wan penalty blong winim maj ia blong Tupuji.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.