Futbol

Digicel Amicale i selebretem poen blong Zika Manuhi (raet) las wiken

Las wiken i lukim AFIC Top 4 tunamen blong Port Vila Football Association i kik off.

Wetem fomat blong kompetisen i jenis kompea long las yia, i lukim top blong klasmen we semtaem hemi wina blong jampionship, Ifira i pleiem rana ap Erakor, mo wina i go stret long grandfaenol, mo hemia i lus i wet long semi faenol.

Namba 3 mo namba 4 we hemi Tupuji Imere mo Digicel Amicale oli plei wan eliminesen maj, we i min se tim we hemi lus i aot long kompetisen mo wina i pleiem lusa blong fes maj.

Wetem niufala fomat ia we plante long olgeta fan i jas awea long hem long Sarere las wiken, fes maj i lukim Ifira Black Bird FC i kam blong winim Erakor Golden Star FC long penalty shootout.

Tufala tim i bin go witaot eni poen afta long 90 minit, nomata we tugeta saed i bin gat janis blong sko.

Long sekon haf wan insiden i bin kostem tufala tim wan man daon afta we rafri, Robinson Banga, i bin givim red kad long Jason Thomas mo Moffat Kilifa, we i min se Jason bambae hemi mestem semi faenol mo Moffat, grand faenol.

Afta long ekstra taem i nogat eni sko i mekem se tufala tim i go stret long penalty shootout, we Ifira hemi kam blong winim long 2-0, afta we kipa, Anthony Taiwia hemi mekem 2 ‘save’ mo Erakor midfilda i smashem bol long kros ba.

Win blong Ifira i lukim olgeta i kam blong konfemem long olgeta fan long Sarere from wanem nao olgeta i niu Port Vila Football Association Digicel premia divisen wina blong sisen ya.

Long sekon maj blong dei, Digicel Amicale i kam blong winim Tupuji Imere long 3-1.

Gibson Daudau nao hemi openem sko bifo Bong Kalo hemi dabolem, blong putum sko long haf taem long 2-0 long feva blong Digicel Amicale.

Long sekon haf, wan volley blong Don Mansale i karem Tupuji i kambak insaed long gem, be i lukim Zika Manuhi hemi endem eni hop blong Tupuji i faenem wan ikwalaesa, taem we hemi addem namba 3 mo faenol sko blong maj ya.

Wetem risal ya, i lukim Erakor Golden Star FC bambae hemi pleiem Digicel Amicale FC long semi faenol blong AFIC Top 4 long 2pm long wiken ya.

Daily Sports i notisim se las wiken wan rikod namba blong kraod oli bin tenap blong wajem olgeta maj.

Port Vila Football Association i askem olgeta fan blong plis rispektem olgeta pleia mo olgeta maj ofisol insaed long fil.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.