Galaxy FC blong plei MG Tafea FC long grand faenol

Kenis Tangis i stap selebretem sekon poen blong hem las wiken

Afta we desisen blong Independent Komiti i bin deliver leit long eli long evening se Galaxy bambae hemi pleiem BSP Amicale long semi faenol, plante long olgeta futbol fan oli jas awea long hem long Sarere, maj dei.

I bin wan longfala wik las wik blong BSP Amicale, Tafea mo Galaxy afta we MG Tafea hemi bin putum 2 seperet komplen agensem Galaxy i mekem se Independent Komiti we oli setem ap i mas tekem taem blong deliver.

Long Fraede evening, desisen i kamaot se Vanuatu intanasonal, Bong Kalo hemi aot long kompetisen, we i minim se MG Tafea hemi wet nomo long grand faenol.

Stret long 2pm long Sarere BSP Amicale hemi wokbaot i kam insaed long fil blong pleiem Galaxy.

Galaxy nao hemi kam blong openem sko thru long difenda Diego, afta we Pepeta hemi sendem wan bol thru long wan fri kik i go insaed long box mo Diego hemi hedem i go insaed.

Jas bifo maj hemi finis, BSP Amicale koj, Robert Yelou hemi mekem wan jenis blong putum Christopher Andrew hemi go insaed. Jenis ya i lukim Andrew hemi go in mo hedem in ikwalaesa jas bifo maj hemi finis, blong putum sko long full taem long 1-1.

Long ekstra taem, Kensi Tangis hemi kam blong skorem 2 poen long fes haf blong ekstra taem mo Ronaldo Wilkins mo Jonathan Spokey Jack oli kam blong skorem wan poen long sekon haf, blong putum faenol sko long 5-1 long feva blong Galaxy mo semtaem silim wan grand faenol ples wetem MG Tafea FC.

Win blong Galaxy oli stap sendem aot wan stetmen se oli minim bisnis.

BSP Amicale nomata long lus oli soemaot se nekis sisen bambae oli posem wan threat long olgeta nara klab long premia from oli plei wan simple be konstraktif futbol.

Daily Sport hemi wantem raisem tu isiu blong regulesen blong Top 4, blong nekis taem PVFA hemi traem stoppem sem kaen insiden olsem blong i happen, from hemi stap spoilem moral blong olgeta pleia mo semtaem olgeta fans tu, mo i moa gud long fiuja olgeta kaen insiden olsem i no mas happen bageken.

Grand faenol bambae hemi stap long Wednesde namba 1 May stret long 2pm long Port Vila Stadium.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.