Football

Olgeta fren oli bin drink kava las wan wetem unifom blong kaontri we oli sapotem bifo tunamen i stat, naoia kolosap i finis nao.

Noes blong olgeta World Cup fans raon long Port Vila i go daon plante afta we sam long olgeta bigfala nem insaed long World Cup ya olsem Argentina, Germany, Brazil, Spain mo Portugal oli karem plen i go bak finis.

Daily Sport i bin harem plante nius follem exit blong samfala bigfala nem long World Cup ya, olsem wan storian i bin kamaot long Freshwater fil se afta long lus blong Brazil agensem Belgium long kwota faenol, i lukim olgeta fans blong Brazil samfala we oli drong oli bin harem nogud se tim blong olgeta i lus oli wantem statem rao mo faet long fil long taem ya, be i lukim komiuniti i kam mo seraotem olgeta bageken.

Semak insiden i happen long Saralana long semak dei ya, olgeta fan blong Brazil i tretenem mo sakem hand long samfala we oli bin stap blong wajem maj long taem ya.

Long plante nakamal raon long Port Vila, yu we yu werem wan uniform blong wan kaontri we bar man hemi no sapotem, hemi no save sevem yu.

Long Luganville ripot i kamaot se afta long lus blong olgeta bigfala nem ya, plante trak oli flyem olgeta flag blong fofala kaontri we bambae oli plei long semi faenol tede long moning mo tumoro long moning, France, Belgium, England mo Croatia.

Ripot long Luganville i talem se fulap oli jenisim sapot long semi faenol ya.

Long Port Vila tu naoia i lukim fulap sapota blong Croatia, Belgium mo England hemia afta nomo we olgeta kaontri ya oli go thru long semi faenol.

Olsem toktok blong wan fan blong France i talem se hamas hamas be mi sapotem tim ia longtaem finis i kam.

Olgeta sapota blong Franis tede long moning long 5am, long Alliance Francaise bambae olgeta sapota i kam tugeta blong wajem semi faenolo bitwin France mo Belgium.

Alliance Francaise i putum aot notis se bambae i gat coffee mo bread wetem olgeta samting blong breakfast i available thru aot long maj ya.

Olgeta fan blong England, i gat konfemesen i kamaot finis long Korman Stadium se grup bambae hemi go sapotem tim blong olgeta long we mo olgeta nara fan blong futbol i welkam blong kam joen, be nomo se kam wetem Vt100 fee blong yu pem.

Maj bambae i kik off tumoro long 5am, be gate blong Korman mo doa i open long 3am.

Naoia we World Cup i stap kam kolosap long end blong hem lukluk i stap se bambae Port Vila mo Vanuatu i save silip long taem bageken, afta we i lukim wan full manis we olgeta futbol fan i no silip gud from futbol nomo.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.