Tafea difenda, Noah Roger i stap kliarem wan bol las wiken

Las wiken long Port Vila Stadium i lukim Erakor i pleiem 1 aot long trifala outstanding maj blong hem wetem Tafea FC.

From se Erakor Golden Star hemi bin go long Oceania Champions League, hemi gat 3 aotstanding maj blong hem, wan wetem Tafea las wiken, narawan wetem Mauwia mo las wan wetem Ifira Black Bird.

Long maj blong las wiken, Tafea FC i fosem Erakor Golden Star blong pleiem wan futbol we oli pleiem plante nao olgeta longfala bol.

Tafea hemi putum presa long everi bol Erakor hemi karem insaed long fil, i mekem se oli fosem Erakor blong plei go bak bihaen blong oli sakem bol kam long fored blong lukaot tufala straeka, Jean mo Tony Kaltak.

Wetem Erakor hemi wokem sakem olgeta longfala bol i mekem se midfil blong olgeta i no wok had inaf, mo i gat spes bitwin midfil mo difenda, we everi taem Tafea hemi hollem bol oli oltaem kosem wan ‘threat’ long Erakor.

Wetem midfil blong Erakor oli no wok gud, Tafea i kapitolaes long hem ya afta we oli winim wan fri kik jas aotsaed long raet kona box blong Erakor. Nichol Tari hemi faerem bol ia ovarem wol mo i go stret long hed blong Eddison Stephen we i hedem bol ia ova long Serge Daniel i go insaed long net.

Hemi no wan sapraes nating blong olgeta fan blong luk Eddison i sko, from hemi stap sko long everi maj blong Tafea sins dei 1, mo las wiken hemi ‘outstanding’ insaed long fil.

Tafea hemi gat janis blong mekem 2 -0, be i lukim Robert Tasso, we hemi ‘one on one’ wetem Serge Daniel, hemi wantem dribol bitim Daniel, be i lukim Daniel hemi karemaot bol ya long leg blong Tasso.

Fes haf i finis, Tafea 1 mo Erakor 0.

Long sekon haf, Tafea i kontiniu blong distebem maj blong Erakor, be i lukim Erakor kapten, Brian Kaltak, we hemi bin sko long maj wetem Tupuji, hem bageken, hemi sevem tim blong hem taem hemi tapem wan bol insaed long box i go insaed long net, afta we Tafea difens i feil blong kliarem, blong putum faenol sko long Erakor 1 mo Tafea 1.

Long tufala nara maj blong wiken long Port Vila Stadium, fes maj i lukim Shepherds United i winim ABM Galaxy long 2-0 mo sekon maj blong dei, Black Diamond oli kam blong winim Kings long 6-1.

Port Vila Football Association bambae hemi kontiniu long sekon leg blong premia divisen long wiken ia.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.