Futbol

Ian Paia (left) mo Jacky Ruben (raet) oli faet from bol

By Raymond Nasse

Las maj blong fes leg blong 2016/2017 sisen blong premia division blong Port Vila Football Association i tekem ples long Tasde 3pm, bitwin olgeta jampion blong Vanuatu, Erakor Golden Star FC mo Ifira Black Bird FC.

Nomata we rain hemi stap foldaon plante long aftanun ya, maj hemi on nomo.

Ifira oli fieldim olgeta Solomon Islands import pleia olsem Joses Nawo, Moffat Kilifa, Charlie Otainao, Harrison Mala, Ian Paia mo Dunstan Quanafia long maj ia.

Fes haf i kik off, Erakor hemi presa long Ifira antap long haf blong Ifira nomo, i mekem se Ifira oli pleiem Ian Paia nomo long fored mo everi wan i foldaon kambak bihaen blong difendem gol maot blong olgeta.

Nemani Roqara hemi gat janis blong putum Erakor long fored long fes haf, be i lukim shoot blong hem ya i jas go ovarem kros ba nomo.

Fes haf i finis, Erakor 0 mo Ifira 0.

Long sekon haf Joses Nawo mo Moffat Kilifa oli mekem fes apiarens blong olgeta wetem Ifira long sisen, mo i lukim insaed long olgeta fes 3 minit, Nawo hemi faerem wan bol jas aotsaed long raet hand kona box blong Erakor kipa, Serge Daniel, be i lukim bol ia i go stret nomo long Daniel.

Wetem Moffat mo Nawo Ifira hemi atak plante long wing, be i lukim oli neva kosem eni denja nomo long baklaen blong Jason Thomas mo Brian Kaltak.

Klia janis blong Ifira i sko long 72 minit taem we Kilifa hemi setemap Otainao insaed long box blong bitim nomo Daniel, be i lukim Otainao hemi hitim bol ia go aotsaed, nomata we last post hemi open nomo i stap.

Faenol sko, Erakor 0 mo Ifira 0.

Tede bambae i nogat maj long Port Vila Stadium, be bambae i lukim olgeta maj blong sekon leg blong premia division i kik off bageken long Mande nekis wik.

Olgeta maj blong Mande namba 17 April i lukim long Port Vila Stadium long 9am, Mauriki i pleiem Siaraga, 11am, Tupuji i plei Ifira, 1pm, Mauwia i plei Tafea mo long 3pm, Amicale i plei Erakor.

Long Antoine Rossi fil, 11am, Pango i plei North Efate, 1pm, Kings i plei Shepherds United mo long 3pm, Spirit 08 i plei ABM Galaxy.

Long Kawenu fil, 9am, Torba i plei United Malampa, 11am, Easton i plei Redal, 2pm, Narak i plei Yatel mo long 4pm, Lopatu i plei Varona. Ofisol klasmen afta long fes leg blong premia, fes mo sekon division bambae i kamaot nekis wik.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.