Futbol

Taem we Vanuatu Football Federation (VFF) hemi pem rod blong olgeta President blong olgeta Memba Assosiesen oli kam daon blong wajem Group C aksen blong Oceania Champions League long Korman Stadium, i gat kwesten i stap se oli luk save se futbol blong yumi i go daon plante?

Taem we Erakor hemi stap pleiem Ba FC, Kiwi FC mo Team Wellington olgeta hed blong futbol long kaontri oli staon antap long grandstand mo oli klap mo singaot follem everi aksen we i stap go on insaed long fil. Oli aot kam long Port Vila, oli silip long Motel, gat olgeta alawens, be yet oli no luk save se Vanuatu i nogat wan klab i advans i go long knockout stej blong Oceania Champions League.

I nogat wan President hemi kamaot blong resem konsen blong hem follem isiu ya taem we i lukim everi nara Pasifik aelan stet, oli gat 1 o 2 representatif i go long nekis raon, be Vanuatu i nogat.

Kwesten i stap se wea ples nao Vanuatu i go rong long hem mo wanem nao yumi nid blong mekem blong jenis imej blong futbol blong yumi.

Yumi save talem tu se maet ating fomat blong kwalifae from Champions League yumi nid blong jenisim, from naoia we i stap Port Vila Football Assosiesen nomo hemi gat semi profesonol lik mo insaed yu save faenem pool blong seleksen blong nasonal tim, be olgeta nara assosiesen oli nid yet blong kajap wetem level blong kompetisen.

Luganville Football Assosiesen klab jampion, Malampa Revivors hemi kam daon blong go kompit long Oceania Champions League long New Caledonia oli mas rikrut bageken long Port Vila Football Assosiesen blong strengthenem tim blong olgeta.

Tingting blong mekem olgeta nara Memba Assosiesen oli faet from wan ples insaed long Oceania Champions League mo Port Vila i faet from wan i mas stop, fomat ya i no wokaot, i nid blong jenis.

Sapos olgeta Memba Assosiesen President, we olgeta nao i stap disaedem daereksen blong futbol long kaontri oli staon mo putum hed tugeta mo kamap wetem wan ‘winning formula’, leko olgeta politics mo diferens long saed, bambae yumi save luk jenis long ples ya.

Pawa blong majoriti hemia nao i stap mekem se yumi stap ting se futbol blong yumi i stap go long fored, be reality nao yumi stap luk tede.

Futbol blong tede hemi olsem wan entetenmen nomo, yumi go blong wajem olgeta pleia i ronem bol insaed long fil, olgeta koj i singaot long saed laen, yumi singaot long everi desisen blong laensman mo rafri, be yet yumi no luk save se futbol level blong yumi i go daon bigwan.

Taem we Erakor hemi kam blong winim Kiwi blong Samoa long 2-0 nomo, Samoa we Vanuatu hemi stap winim long hae sko bifo, hemi stap soem wan saen finis ya.

Olgeta Polynesian kaontri olsem Samoa oli gat olgeta teknikol man i kam ovasi olsem Holland, oli putum olgeta diferens blong olgeta long saed mo fokas moa long developmen blong olgeta koj, pleia mo administresen. Risal blong hem nao Port Vila i bin witnessim Erakor i faenem i had blong putum moa poen agensem Kiwi, we i kostem olgeta 2019 Oceania Champions League, taem oli lusaot long gol avarej.

Hemi taem blong Vanuatu Football Federation hemi putum priority long developmen long everi eria, stat long administresen kasem teknikol, instead blong putum fokas long olgeta nara aktiviti we tede i risal blong hem Vanuatu i nogat wan klab long sekon raon blong 2019 Oceania Champions League.

Vanuatu i gat plante long olgeta top pleia long rijen, be system i stap long feva blong olgeta.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.