Black Diamond FC hemi stap askem olgeta fan blong go sapotem hem long wiken ya taem oli disaedem top blong klasmen blong Port Vila Football Association fes divisen.

Long 11am, full komiuniti blong Erakor bridge bambae oli stap antap long Antoine Rossi fil blong witnessim tim blong olgeta, Black Diamond we naoia hemi stap sekon long klasmen wetem 11 poen bambae hemi pleiem Shepherds United, we hemi toppem klasmen wetem 13 poen.

Eni wan long tufala i win, bambae hemi toppem klasmen.

Press Ofisa blong Black Diamond, Tenkon William hemi talem long Daily Sport se bambae oli tritim maj long wiken ia olsem wan grand faenol.

“Sins jampionship i stat mifala i lusum wan gem nomo long sisen ya.

“Aim blong mifala blong go antap long premia divisen long niufala sisen ya. Mifala i tritim fes divisen olsem wan visit nomo blong mifala go antap long premia,” William i talem.

“Longterm aim blong klab hemi blong kasem top 4 long premia divisen mo kwalifae from Oceania Champions League.”

William i talem se from klab hemi wan komiuniti klab, afta long maj long Sarere ya bambae i gat fanresing blong klab long Erakor bridge mo hemi stap askem everi fan mo family blong Black Diamond blong go sapotem klab blong olgeta.

Long nara nius blong futbol, Oceania Champions League long New Zealand, Group C, i lukim Malampa Revivors i kam blong lusum sekon maj blong hem yestede agensem olgeta Solomon Islands klab, Western United long 2-1.

Sko i bin stap long 1-1 long haf taem, taem we kapten John Alick hemi konveten wan penalty, be i no inaf blong winim maj ia blong Malampa Revivors, we naoia hemi aot finis long kompetisen wetem wan maj iet wetem Auckland City i stap.

Long Group D long Tahiti, Erakor Golden Star hemi raetem wan niu histri blong hem taem oli kam blong winim olgeta Solomon Islands jampion, Marist FC long 2-1 yestede aftanun.

Marist nao hemi openem sko, be i lukim Tony Kaltak hemi kam blong ikwalaes jas bifo fes haf i finis.

Leit long sekon haf bifo maj i finis, Tony hemi makem namba 4 poen blong hem long kompetisen mo semtaem givim 3 poen long klab blong hem.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.