Saot Efate Shefa Futbol Asosiesen (SESFA) hemi klosemap olgeta knock out programs blong hem blong 2018 lo Erakor futbol fil yestedei.

Afta long olgeta semi finol gems blong hem las wik lo Erakor futbol fil, i lukim gem blong namba tri ples Taturu FC hemi plei agensem Matantopua FC lo fes maj.

Maj hem i bin strong bitwin tugeta saed mo i lukim tufala tim i kam blo dro lo 2-2 mo oli bin ko insaed lo wan penalti sut aot. Long penalti sut aot ya, Taturu FC hemi kam in blong win lo wan sko blong 4-2.

Lo sekon gem mo semtaem faenal i lukim Eraniau FC hemi plei agensem Naka GC blong faenemaot jampion blong SESFA 2018 knock out tunamen ya. Gem hemi bin kik of mo i lukim Naka FC hemi sko fes wan blong putum olgeta lo lid insaed lo fes haf. Lo sekon haf, Naka FC hemi mestem blong mentenem lid ya taem hemi lukim Eraniau FC hemi kam in blong sko mo putum tugeta tim lo dro. Tufala tim i bin gat fulap janis blong sko beh tru long ol hadwok blong olgeta difenda, ol straeka blong tugeta tim i no bin gat janis nomo blong putum bol insaed long net. Long 60 minit blong sekon haf, Eraniau FC hemi bin putum moa presa mo i lukim oli kam in blong skorem wan moa poen blong putum olgeta olsem jampion blong 2018 SESFA knock aoot tunamen ya.

SESFA hemi talem tankiu i go lo Minista blong helt mo semtaem MP blong Efate konstituensi, Minista Jack Norris blong save sponsarem olgeta prize awod blong tunamen ia.

Hemi talem tok tankiu tu i go lo SESFA program kodineta, ol jif mo komuniti blong Erakor vilij blong save hostem olgeta gems long Erakor futbol fil. Hemi aknolejem tu olgeta tim blong save pat lo tunamen ya.

Presiden blong SESFA, Michel Kalworai hemi talemaot se afta long olgeta gems ya bambae SESFA hemi statem wetem olgeta jampionsip gems blong hem blong 2019. Hemi talemaot se olgeta knock out gems ya hemi blong priperem olgeta klab from 2019 jampionsip we i stab kam antap.

Mr Kalworai hemi talemaot se olgeta jampionsip gems blong SESFA 2019 bambae i stat long 19 July.

Hemi konfemem se i gat 10 tim evriwan wei bambae oli tekpat lo jampionsip maj blong 2019.

Mr Kalworai i apil i go lo olgeta klabs se bifo 19 July, evri klab sud rejista finis mo stretem olgeta afiliesen fi blong ol.

Hemi talem se rejista process ya i nid blong olgeta klab i konsalt wetem VFF, Shefa Futbol Asosiesen mo SESFA.

Mr Kalworai hemi talem se process ya hemi pat blong disentrolaesesen program blong gavman.

SESFA Presiden hemi mensenem tu se SESFA tu emi bin konsalt wetem Mele Indipendense komiti blong save alawem eni SESFA klab wei i interes blong wantem tekpat long Indipendense knock out lo Mele vilij i savei ko rejista wetem Mele organaesing komiti. Hemi talem se fi blong patispet hemi stab anda lo Mele komiti.

SESFA emi stab kontinu blong askem ol sponsa wei i wantem sponsarem SESFA 2019 jampionsip blong save kam fowod mo letem olgeta komiti blong hem i save. Hemi apil tu i go lo olgeta MP blong Efate se oli welkam blong kam sponsa sipos oli interes blong save sapot long olgeta SESFA program we i stap kam.

SESFA hemi stap wishim evri tim gud lak long priperesen blong olgeta tuwods SESFA 2019 jampionsip.

Program blong 2018 SESFA knock aot tunamen hemi klos wetem olgeta prize awod ceremoni.

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.