Futbol

2019 PVFA Top 4 wina, Galaxy FC

Plante long olgeta Oceania football fans oli bin go online mo sendem olgeta congratulatory mesej i kam long Galaxy FC taem oli winim tikit blong olgeta i go insaed long 2020 OFC Champions League long wik ya wetem wan 2-1 win ova long MG Tafea FC.

“Win blong Galaxy FC hemi wan histri bageken blong klab ya we i lukim fes taem we mifala i kasem premia divisen, be mifala i kwalifae from OFC Champions League,” President blong Galaxy FC, Jackson George i talem.

“Mifala i statem wokbaot ya, fes pat blong hem nao i finis tede ya, be mifala i gat wan moa longfala wokbaot bageken taem bambae mifala i go blong pleiem 2020 OFC Champions League.

“Olgeta ajivmen blong klab i kam thru nomo long dedikesen blong olgeta pleia we oli biliv se tim i save win, mo tu mi mas mensenem tufala koj, Batram Suri mo Asisten blong hem, Moise Poida.

“Tankio long kapten Seloni Iaruel, olgeta fan, family mo Manejmen, Yatel FC, Shepherds United FC mo Ifira Black Bird blong save lendem olgeta pleia blong olgeta mo tu tankio long MG Tafea mo BSP Amicale from wan gud jalenj.

“Galaxy FC hemi win tede ya from hadwok blong everi wan,” George i talem.

George i talem se blong win wan, klab i mas gat faenansol bak ap. Hemi talem se Galaxy FC hemi go long 2 wik camp, oli spendem 1 milien vatu long trening camp nomo.

Olgeta pleia oli saenem kontrak, mo klab i pem olgeta, antap long hem oli winim faenol ya bageken mo kwalifikesen, klab i givim bonus long olgeta bageken.

“Hemi no wan jip eksasaes sapos yu wantem win, yu mas spendem mane blong yu win,” George i talem.

Wetem taget blong OFC Champions League oli ajivim finis, naoia nekis wokbaot hemi preperesen blong OFC Champions League.

“Mifala i stap naoia focus 100% long olgeta lokol pleia blong karem i go long OFC Champions League, be bageken kwesten i stap se lokol pleia bambae oli save pefom semak olsem olgeta impot pleia, oli mas pruvum long klab se oli meritim blong go sapos no be, yumi stap lukluk samples nao blong pushum hand, be olsem me talem, priority long lokol pleia feswan.

“Mi stap konfemem naoia se Galaxy koj hemi lokol koj.

“Klab i gat plan blong tour overseas long Australia go kasem Asia blong priperem klab from OFC Champions League.

“I no mata sapos mifala i go kaikai namba o wanem be hemi pat blong preperesen.

“Priority blong klab olsem hemi lukaotem gud welfare blong olgeta pleia, ples ia nao hemi winning recipe blong klab, yu lukaotem gud mo pem gud olgeta pleia, nomata se impot o lokol, everiwan oli pem olgeta semak nomo, hemi nao i mekem se klab i save ajivim aim blong hem mo naoia bambae mifala i focus bageken blong priperem klab from OFC Champions League,” George i talem.

“Mifala stap wet naoia tu blong pleiem wina blong olgeta nara MA from posisen blong Vanuatu 1 mo Vanuatu 2, we hemi impoten from i gat bigfala janis se Vanuatu 1 bambae hemi host,” George i talem.

Kapten blong Galaxy FC, Seloni Iaruel i wantem talem tankio long everi pleia, inkludum tufala Brazilian mo mo Solomon Islander, se witaot working tugeta blong olgeta insaed mo aotsaed long fil, bambae Galaxy i no save win.

Vanuatu i bin pruvum recipe ya long Mini Games taem oli pem olgeta pleia mo oli kam blong winim Gold medal, mo naoia bageken Galaxy FC hemi pruvum, we i stap soem aot se futbol blong tede sapos yu wantem win, yum as stand by blong yu spendem mane blong mekem gud olgeta pleia mo pem gud olgeta, from futbol i no save putum rice long tebol.

Yumi gat olgeta gudfala pleia we oli go long RSE, from futbol i no save sapotem olgeta, be Galaxy hemi stap invaetem olgeta pleia se yu kam plei blong Galaxy klab bambae i lukaotem mo pem gud yu, from futbol blong tede i no olsem hemia blong yestede.

Raymond Nasse

Sports Editor

raymond@dailypost.vu

(0) comments

Welcome to the discussion.

Keep it Clean. Please avoid obscene, vulgar, lewd, racist or sexually-oriented language.
PLEASE TURN OFF YOUR CAPS LOCK.
Don't Threaten. Threats of harming another person will not be tolerated.
Be Truthful. Don't knowingly lie about anyone or anything.
Be Nice. No racism, sexism or any sort of -ism that is degrading to another person.
Be Proactive. Use the 'Report' link on each comment to let us know of abusive posts.
Share with Us. We'd love to hear eyewitness accounts, the history behind an article.